Quant out ço dist l'abes Brandan,
Bien ad curut de mer un grant pan.
Veient terre alte e clere,
Sicum lur out dist cil frere.
Venent i tost e arivent,
Ne de l'eisir ne s'eschivent,
Ne pur altre rien ne dutent,
Mais a terre la nef butent.
Amunt un duit s'en vunt süef
E od cordes traient lur nef.
Al chef del duit out une arbre
Itant blanche cume marbre,
E les fuiles mult sunt ledes,
De ruge e blanc taceledes.
De haltece par vedue
Muntout le arbre sur la nue;
Des le sumét desque en terre
La brancheie mult la serre
E ledement s'estent par l'air,
Umbraiet luin e tolt le clair;
Tute asise de blancs oiseus:
Unches nul hom ne vit tant beus.