Par mer d'ileoc se sunt tolud,
Desque al jusdi vint absolud;
Dunc repairat peres Brandan
En la terre u fud l'altre an.
Ast lur hoste, le veil chanud:
Al port lur ad un tref tendud;
Bainéd i ad les travailez,
E nuveals dras apareilez.
Funt la ceine e lur mandét
Cum en escrit est cumandét.
E sunt ileoc desque al .iii. di.
Turnerent s'en al samadi
E vunt siglant sur le peisun.
L'abes lur dist: 'Fors eisum !'
Lur caldere qu'il perdirent
En l'an devant, or la virent;
Li jacoines l'ad gwardee,
Or l'unt sur lui retruvee.
Plus asoür sur lui estunt,
E lur feste bele i funt.
Tute la nuit desque al matin
De festïer ne firent fin.
Le di paschur celebrïent;
De lur hure ne s'ublïent:
Plus de midi ne targerent,
Mais dunc lur nef rechargerent.