Granz curs unt fait li pelerin,
Mais uncore ne sevent fin.
E nepurtant ne s'en feignent:
Mais cum plus vunt, plus se peinent,
Ne de peiner ne recrerrunt
De ci que lur desir verrunt.
Apparut lur terre truble
De neir calin e de nuble:
De flaistre fum ert fumante,
De caruine plus puante;
De grant nerçun ert enclose.
Cist ne rovent estre en pose,
E de mult luign unt or oït
Que la ne erent guairs goït.
Mult s'esforcent de ailurs tendre,
Mais ça estout lur curs prendre
Quar li venz la les em meinet.
E li abes bien les enseignet
E dist lur: 'Bien sachez
Que a enfern estes cachez.
N'oustes mester unc mais si grant
Cum or avez de Deu guarant.'
Brandans ad fait sur eals la cruz.
Bien set, pres est d'enfern li puz:
Cum plus pres sunt, plus veient mal,
Plus tenebrus trovent le val.
Des parfunz vals e des fosses
Lammes ardanz volent grosses.
De fous sufflanz li venz enruit;
Nuls tuneires si halt ne muit.
Estenceles od les lammes,
Roches ardanz e les flammes
Par cel air tant halt volent
Le cler del jurn que lur tolent.