Li venz la nef ad cunduite,
Pur quei d'iloec pregnent fuite.
Al vent portant s'en alerent,
Mais la suvent reguarderent:
L'isle virent alumee
E cuverte de fumee.
Malsfez veient millers plusurs;
Criz de dampnez oënt e plurs.
Püur lur vent forment grant
Del fum chi luign par l'air s'espant.
Endurerent cum melz pourent;
Eschiverent cum plus sourent.
Sainz hoem cum ad plusurs travailz
De faim, de seif, de freiz, de calz,
Ainxe, tristur e granz poürs,
De tant vers Deu creist sis oürs.
Eisi est d'els puis q'unt voüd
U li dampnez sunt reçoüd :
En Deu ferment lur fïance,
N'i aturnent mescreance.
Vunt s'en avant, n'i dutent rien;
Par ço sevent que espleitent bien.