Ne demurat fors al matin
Virent un lu pres lur veisin:
Un munt cuvert de nublece;
Las meineit vent par destrecce.
Vindrent i tost al rivage,
Mais mult ert de halt estage:
Nuls d'els trestuz choisir ne pout
La haltece que li munz out.
Vers la rive plus ne descent
Que la u plus amunt s'estent.
E la terre est tute neire;
Tel nen out en tut lur eire.
Pur quel chose il ne sourent,
Salt en l'uns fors; puis ne l'ourent.
Tuit unt oïd qu'il lur ad dit,
Mais sul l'abes des uilz le vit:
'Seignur, or de vus sui preiez
Pur mes pechez, bien le crëez.'
E li abes le veit traire
A cent malfez chi le funt braire.
Turnent d'iloec, ailurs en vunt;
Reguardent sei quar poür unt.
Del fum li munz est descuverz,
Enfern veient tut aüverz.
Enfers jetet fus e flammes,
Perches ardanz e les lammes,
Peiz e sufre desque as nües,
Puis les receit, quar sunt sües.