Par lundi e nuit e jurn
En la roe sui en tresturn,
Et jo chaitis, encröez enz,
Turni tant tost cum fait li venz.
Venz la cunduit par tut cel air :
Tot dis m'en voi, tot di repair.

Puis el demain en sui galiz
Cum cil qui est tot acaliz;
Ultre la mer vol en le val
A l'altre enfern u tant ad mal.
Iloces sui tost ferlïez,
De dïables mult escrïez;
El lit sui mis sur les broches;
Sur mei mettent plums e roches;
Iloces sui si espëez
Que mun cors tant percét vëez.
Al mecredi sus sui rüez
U li perilz m'i est müez:
Pose del jurn buil en la peiz
U sui si teinz cum ore veiz;
Puis sui ostét e mis al rost,
Entre dous fus liéd al post.
Li post de fer fichét i est;
Se pur mei nun, pur el n'i est.
Tant est ruges cume si dis anz
En fus goüst as fols sufflanz.
E pur la peiz li fus s'i prent
Pur enforcer le men turment;
E dunc resui en peiz rüez,
Pur plus ardeir sui enlüez.
Ne n'est marbres nuls itant durs
Ne fust remis se fust mis surs,
Mais jo sui fait a icest' ire
Que mis cors ne poit defire.
Itel peine, que que m'anuit,
Ai tut un jurn e une nuit.