Brandans s'en vait d'iloec avant.
Bien set de Deu ad bon guarant;
E li muine bien sevent tuit
Que segur sunt al Deu cunduit;
Mercïent Deu de lur veies
E de tutes lur agreies.
Cum se numbrent li cumpaignun,
En lur cunte failent a l'un,
E ne sevent qu'est devenuz
Ne en quel leu est detenuz.
Des dous sevent cum unt errét,
Mais de cest terz sunt enserrét.
L'abes lur dist, qui tut le sout:
'Deus en ad fait ço que li plout.
D'iço n'aiez nule dute,
Ainz tenez bien vostre rute.
Sachez qu'il ad sun jugement
U de repos u de turment.'